حوزہ نیوز ایجنسی کی رپورٹ کے مطابق، ایران کے صوبہ خراسان رضوی میں رہبر معظم کے نمائندے اور مشہد کے امام جمعہ، آیت اللہ سید احمد علم الہدی نے کہا ہے کہ اربعین، واقعۂ کربلا کے حقیقی پیغام کو سمجھنے کا بہترین موقع ہے۔ عاشوراء امت کو اسلام شناسی، امام شناسی، ولایت سے وابستگی اور حق کے دفاع کا درس دیتا ہے، جبکہ دنیا پرستی اور ولایت سے دوری انسان کو حقیقی کامیابی سے محروم کر دیتی ہے۔
انہوں نے اربعین حسینی کے موقع پر حرم امام رضا علیہ السلام میں منعقدہ تقریب سے خطاب کرتے ہوئے کہا کہ جو افراد زیارت اربعین سے محروم رہ جاتے ہیں، ان کے لیے امام رضا علیہ السلام کے روضے پر عزاداری اور عاشورا کے اہداف کی تجدیدِ عہد ایک عظیم نعمت ہے۔
آیت اللہ علم الہدی نے کہا کہ اربعین، اہل بیت علیہم السلام کی اسیری، صبر اور تبلیغی جدوجہد کے ذریعے قیامِ امام حسین علیہ السلام کے حقیقی مقاصد کو آشکار کرتا ہے۔ ان کے مطابق کربلا کا ایک روشن رخ ایثار، قربانی، حق کی حمایت اور دین کی حفاظت ہے، جبکہ دوسرا رخ ظلم، خیانت اور اہل بیتؑ کے دشمنوں کی سنگ دلی کو نمایاں کرتا ہے۔
انہوں نے زیارت اربعین کے اقتباسات کی تشریح کرتے ہوئے کہا کہ امام حسین علیہ السلام کی عظیم قربانی کا مقصد صرف یزید کی حکومت کا خاتمہ نہیں تھا بلکہ انسانیت کو جہالت، گمراہی اور دین کی غلط تعبیر سے نجات دلانا تھا۔ انہوں نے کہا کہ بنو امیہ کے مسلسل پروپیگنڈے نے لوگوں کو یہ باور کرا دیا تھا کہ حکومت ہی اسلام ہے، جس کے باعث بہت سے لوگ قیامِ حسینی کی حقیقت کو نہ سمجھ سکے۔
آیت اللہ علم الہدی نے کہا کہ اہل بیت علیہم السلام کے خطبات نے عوام کی سوچ بدل دی اور یہی اربعین کا اصل پیغام ہے کہ صحیح تبیین معاشروں میں فکری انقلاب برپا کر سکتی ہے۔
انہوں نے مزید کہا کہ عصرِ غیبت میں ولایتِ فقیہ، امامت کے تسلسل کی علامت ہے اور ایک حسینی معاشرے کی ذمہ داری ہے کہ وہ اسلام، امامت اور ولایت کی صحیح معرفت حاصل کرے اور امام حسین علیہ السلام کی طرح حق اور ولایت کے دفاع میں آخری سانس تک ثابت قدم رہے۔ انہوں نے زور دیا کہ اربعین ایمان، بصیرت، استقامت اور وفاداری کا درس دیتا ہے، جبکہ دنیا پرستی اور ولایت سے دوری انسان کو تباہی کی طرف لے جاتی ہے۔
آپ کا تبصرہ